წიგნში შესწავლილია ერთი ბიბლიური კონცეფცია, რაც ერებისა და ეროვნულობის წისქვილზე ასხამს წყალს და ჩვენს აპოკალიფსურ საუკუნეში მასონურ-კოსმოპოლიტურ მოძღვრებებს ეწინააღმდეგება.

     მიხეილ ჯავახიშვილის, გალაკტიონ ტაბიძის, კონსტანტინე გამსახურდიას, ტერენტი გრანელის, გოდერძი ჩოხელის, ვაჟა ეგრისელის შემოქმედება საყურადღებოა აპოკალიფსური სახეებით, ბიბლიური პარადიგმებით და ეხმაურება ზოგადსაკაცობრიო პრობლემებს, რის გამოც სათანადო ადგილი ეთმობა მათი შემოქმედების ამ ასპექტებს.

     ნაშრომი წარმოადგენს ცდას, წარმოჩენილ იქნან გრაალის ორდენის რაინდები ჩვენს პოეზიაში. ამ მიზნით გაანალიზებულია გრაალის თემის მხატვრულად ხორცშესხმის მაგალითები გალაკტიონ ტაბიძის, გრიგოლ რობაქიძის, ზვიად გამსახურდიას, მერაბ კოსტავას, ვაჟა ეგრისელის პოეზიაში.

     წიგნი განკუთვნილია დამხმარე სახელმძღვანელოდ ფილოლოგიის ფაკულტეტის სტუდენტებისთვის, ასევე ზემოხსენებული საკითხებით დაინტერესებული მკითხველებისთვის.