„ენათმეცნიერების შესავალი“ თბილისის სახელმწიფო უნივერსიტეტმა 1952 წელს გამოსცა, მაგრამ მას კიდევ უფრო ხანგრძლივი ისტორია აქვს. იგი უკავშირდება არნ. ჩიქობავას საუნივერსიტეტო სახელმძღვანელოების პროექტს ენათმეცნიერების თეორიაში. პროექტი გულისხმობდა ორი სახელმძღვანელოს შექმნას:

1. „ზოგადი ენათმეცნიერება, I. პროპედევტიკული ნაწილი“ (გამოიცა 1935, 1939, 1946 წწ.);

2. „ზოგადი ენათმეცნიერება, II. ძირითადი პრობლემები“ (გამოიცა 1945, 1983 წწ.) - პირველი განიხილებოდა როგორც ელემენტარული, და მეორე, როგორც მასთან ორგანულად დაკავშირებული, ძირითადი კურსი. ისინი იქმნებოდა ავტორის საუნივერსიტეტო მოღვაწეობის პროცესში.