.

ავტორი (ები): ჯემალ ჯინჯიხაძე

ვებგვერდი:
ავტორის შესახებ

ჯემალ ჯინჯიზაძე - ქართველი პედაგოგი, მათემატიკის მეთოდისტი, ენათმეცნიერი, ლექსიკოგრაფი, მათემატიკის ისტორიკოსი, პოეტი, პუბლიცისტი, საზოგადო მოღვაწე, ფილოლოგიურ მეცნიერებათა კანდიდატი (1986), პედაგოგიკურ მეცნიერებათა დოქტორი (1995), პროფესორი (1995), საქართველოს განათლების მეცნიერებათა, ცხუმ-აფხაზეთის მეცნიერებათა, საქართველოს მეცნიერებათა „აია“ და ფაზისის აკადემიების აკადემიკოსი, გიორგი ლეონიძის სახელობის ლიტერატურული პრემიის ლაურეატი, ომის ვეტერანი, ღირსების ორდენის კავალერი.

60 წიგნისა და 200-მდე მეცნიერული სტატიის ავტორი.

დაიბადა 1940 წელს ზედაეწერში (ზუგდიდის რაიონი). 1964 წელს დაამთავრა ა. მ. გორკის სახელობის სოხუმის სახელმწიფო პედაგოგიური ინსტიტუტი.

1965-1970 წლებში მუშაობდა სოხუმის რაიონის ქვემოეშერის საშუალო სკოლაში ფიზიკის, მათემატიკისა და ასტრონომიის მასწავლებლად. 1970-1993 წლებში კი _ სოხუმის რაიონის ქვემოიაშთხვის ქართულ საშუალო სკოლაში მათემატიკისა და ხაზვის მასწავლებლად. ამ სკოლაში მას 1970-1971 წლებში ეკავა კლასგარეშე და სკოლისგარეშე მუშაობის ორგანიზატორის თანამდებობა.

1971-1974 წლებში განაგებდა აფხაზეთის მასწავლებელთა დახელოვნების ინსტიტუტის მათემატიკის კაბინეტს.

1974 წელს სამუშაოდ მოწვეულ იქნა ა. მ. გორკის სახელობის სოხუმის სახელმწიფო პედაგოგიური ინსტიტუტის (იგივე - აფხაზეთის სახელმწიფო უნივერსიტეტი, 1976 წლიდან) პედაგოგიური ფაკულტეტის დაწყებითი სწავლების პედაგოგიკისა და მეთოდიკის კათედრაზე მასწავლებლად, მათემატიკისა და მათემატიკის სწავლების მეთოდიკის კურსების წასაკითხად. 1974-1989 წლებში იყო აფხაზეთის სახელმწიფო უნივერსიტეტის მასწავლებელი, უფროსი მასწავლებელი, დოცენტი.

აფხაზეთის სახელმწიფო უნივერსიტეტიდან ქართული ნაწილის გამოყოფის შემდეგ, 1989-2006 წლებში, ჯემალ ჯინჯიხაძე იყო ივანე ჯავახიშვილის სახელობის თბილისის სახელმწიფო უნივერსიტეტის სოხუმის ფილიალის დოცენტი, შემდეგ _ პროფესორი.

1989 წელს არჩეულ იქნა პედაგოგიური ფაკულტეტის დეკანისა და დაწყებითი სწავლების პედაგოგიკისა და მეთოდიკის კათედრის გამგის თანამდებობებზე, სადაც მან იმუშავა საპენსიო ასაკამდე. კონკურსების შემოღების შემდეგ, 2006-2022 წლებში სოხუმის სახელმწიფო უნივერსიტეტის სრული პროფესორია. 2022 წლის ნოემბრიდან პენსიაზეა.