აფხაზურ-ქართული ლექსიკონი

წინამდებარე აფხაზურ-ქართული ლექსიკონი შეიცავს 7970. სიტყვას. ლექსიკონში შევიდა აფხაზურში ხშირად ხმარებული სიტყვები, მათ შორის ბევრი ისეთი, რომლებიც შემოემატნენ აფხაზურ ენას აფხაზეთში მზარდი სოციალისტური მეურნეობისა და კულტურის მოთხოვნილებებთან დაკავშირებით.

ნაწარმოები სიტყვები, განსაკუთრებით ნაზმნარი სახელების პრეფიქსიანი წარმოებები, ლექსიკონში შედარებით ცოტა გვხვდება. ლექსიკონში უმთავრესად წარმოდგენილია არანაწარმოები სიტყვები.

ლექსიკონის დამუშავება დაიწყო 1937 წლის ოქტომბერს და ძირითადად დამთავრდა 1938 წლის ბოლოს. წყაროდ არსებულ ლექსიკონთა და რიგ სხვა ნაშრომთა (იხ. გამოყენებული ლიტერატურის სია) გარდა გამოყენებულ იქნა აფხაზურ ენაზე გამოსული ლიტერატურა (სახელმძღვანელოები, მხატვრული ნაწარმოებები, გაზეთები, ჟურნალები...) და ავტორის მიერ შეგროვებული ლექსიკური მასალა აფხაზური ენის აბჟუური და ბზიფური დიალექტებისა).