გამოქვეყნებული ლიტერატურის დეტალური მიმოხილვა ავტორებს საშუალებას აძლევს განიხილონ აღნიშნული პროცესების უახლესი ასპექტები და გამოიკვლიონ რეაქციების მექანიზმები კატალიზატორთა თანაობისას. წარმოდგენილია ახალი კატალიზური მიმართულებები რეაქციათა წარმართვისათვის ისეთ ოპტიმალურ პირობებში, რომლებიც აუცილებელია სილიციუმორგანული ნაერთების ეფექტური სინთეზისთვის. მონოგრაფიაში ნაჩვენებია ჰიდროსილილირების გამოყენების ფართო განვითარება ორგანულ და ასიმეტრიულ სინთეზში, ასევე პოლიმერებისა და მასალების მეცნიერებაში. ნაშრომში წარმოჩენილია უჯერი ბმების შემცველი მონომერული და პოლიმერული ნაერთების გამოყენების ფართო შესაძლებლობა ყოფაცხოვრებასა და სამრეწველო მასალებში.

ავტორები განსაკუთრებით აღნიშნავენ თსუ მაღალმოლეკულურ ნაერთთა ქიმიის კათედრის ყოფილი გამგის, პროფესორ ომარ მუკბანიანის დიდ წვლილს საქართველოში პოლიმერების ქიმიის აღნიშნული მიმართულების განვითარების საქმეში. ო. მუკბანიანის ნაშრომთა მნიშვნელოვანი ნაწილი გაანალიზებულია წინამდებარე ნაშრომში.

წიგნი საინტერესო იქნება როგორც დამხმარე სახელმძღვანელო აღნიშნულ დარგში მომუშავე დოქტორანტების, მეცნიერ-თანამშრომლებისა და ქიმიკოს-ტექნოლოგებისათვის.