ნაშრომი ძირითადად წარმოადგენს ვარდციხე - როდოპოლისის, ეგრისის სამეფოს ერთ-ერთი მნიშვნელოვანი ქალაქის, არქეოლოგიური კვლევის შედეგად მოპოვებული ახ. წ. IV-VII სს. მასალების სრულ დოკუმენტურ პუბლიკაციას. მისი მიზანია შეავსოს ეგრისის ისტორიის შესაბამისი პერიოდის კვლევაში მასალების გამოვლენისა და შესწავლის თვალსაზრისით არსებული ხარვეზი და ამგვარად შეუწყოს ხელი ძეგლების შემდგომ შესწავლას. ამდენად, ნაშრომი გარკვეულ დახმარებას გაუწევს სპეციალისტ მკვლევრებს, ხოლო ფართო მკითხველს შესაძლებლობა მიეცემა გაეცნოს ძველი ეგრისის ამ მნიშვნელოვანი ქალაქის მატერიალურ კულტურას, მისი ანალიზის წყაროების ფონზე.