ცალკე აღნიშვნის ღირსია ის მიდგომები, რომლებშიც მასალის გაცნობიერების გაუმჯობესებისადმი ავტორისეული ზრუნვაა გამოხატული: ახალი საკითხის გადმოცემისას, ავტორი მკითხველს ადრე გავლილ მასალას მეტად აქტუალურად ახსენებს და ამ მასალის ახალ დებულებებთან კავშირ-დამოკიდებულების რთულ ეკონომიკურ კანონზომიერებებს გასაგებად ხსნის. ნიშანდობლივია, რომ ეკონომიკური ტერმინოლოგია სახელმძღვანელოს იმავე გვერდის სქოლიოში განიმარტება, სადაც ისინი პირველად იქნა მოხსენიებული; ყოველი თემის ბოლოს მოყვანილია კითხვები, სასწავლო დავალებები და ტესტები, რაც მიღებული ცოდნის კონტროლისათვის განსაკუთრებით მნიშვნელოვანია. ავტორი, რედაქტორები და რეცენზენტები იმედოვნებენ, რომ წიგნი გამოყენებული იქნება არა მარტო მიკროეკონომიკის საფუძვლების სწავლებაში ავტორიტეტული უცხოური სახელმძღვანელოების პარალელურად, არამედ წარმატებითაც ჩაანაცვლებს მათ, რაც მკითხველს (სტუდენტს) ეკონომიკურ თეორიაში სისტემური ცოდნის მიღებას მნიშვნელოვნად გაუადვილებს.