ისტორიის მეცნიერების შესავალი (ლექციების კურსი)

ისტორია ერთ-ერთი ძველი მეცნიერებაა. ამასთანავე, ისტორიას შესწევს ცოდნის დაგროვების უნარი. მისი შესწავლის ობიექტი ძალიან დიდია. კაცობრიობის მიერ განვლილ გზა ისტორიაა; ეს განვლილი გზა ადამიანის გარეშე წარმოუდგენელია. ყველაზე მეტად რაც აინტერესებთ ადამიანებს, ესაა თვით ადამიანები, მათი ცხოვრება. ამდენად, ისტორია უაღრესად საინტერესო მეცნიერებაა. საისტორიო ხასიათის თხზულებებს გატაცებით კითხულობდნენ, ცდილობდნენ შეძენილი ცოდნა პრაქტიკულ საქმიანობაში გამოეყენებინათ. ჯერ კიდევ ანტიკურ ხანაში უწოდეს ისტორიას „ცხოვრების მასწავლებელი“.

ისტორიის სპეციალობის ბაკალავრიატის საფეხურის სტუდენტები უნივერსიტეტის სასწავლო გეგმის შესაბამისად გადიან საგანს ისტორიის მეცნიერების შესავალი.