1913 წელს „ქართველი ერის ისტორიის“ I - II წიგნების გამოცემის წინასიტყვაობაში ივ. ჯავახიშვილი წერდა: „ისტორია“ ოთხ წიგნად არის განზრახული; პირველი შეიცავს უძველესი ხანის ისტორიას VII საუკუნის პირველ ნახევრამდე, ანუ საქართველოში არაბების ბატონობის დამყარებამდე, მეორე არაბთა ბატონობით იწყება და თამარის მეფობით თავდება, მესამე XIII - XVI ს., ხოლო მეოთხე XVI[I] - XVIII ს. ისტორიას უნდა შეიცავდესო. შემდეგ ხანებში განსვენებულმა აკადემიკოსმა შეცვალა ეს გეგმა და მესამე წიგნად განზრახული XIII-XVI საუკუნეების ისტორია ორ წიგნში გაანაწილა: III წიგნში მოათავსა XIII - XIV საუკუნეთა ისტორია, ხოლო მეოთხეში - XV - XVI საუკუნეებისა (იხ. მეოთხე წიგნის წინასიტყვაობა). მაშასადამე, მეხუთე წიგნი მას განზრახული ჰქონდა მიეძღვნა XVII-XVIII საუკუნეთა ისტორიისათვის.