„ოჯახის სოციოლოგი“

ოჯახის სოციოლოგის მოცემულ სალექციო კურსში განხილულია ისეთი არსებითი საკითხები, როგორიცაა: რა არის ოჯახი, რა უდევს ოჯახის შექმნას საფუძვლად, რა საფეხურები და ეტაპები აქვს მის განვითარებას, როგორი ტიპის ოჯახებია ცნობილი, რა ფუნქციები აქვს ოჯახს საზოგადოებაში, როგორი იყო მისი ისტორიული ფორმები, რა მიმართებაა ოჯახსა და ქორწინებას შორის, რა ფუნქციები და როლი აქვს ქორწინებას საზოგადოებაში, რაში მდგომარეობს ოჯახური ჰარმონიის ფაქტორები, რა იწვევს მეუღლეთა ურთიერთგაუცხოებისა და კონფლიქტებს ოჯახში, როგორია მშობლების განქორწინების შედეგი შვილებისათვის, რა პრობლემებს აწყდება ოჯახი საზოგადოების განვითარების თანამედროვე ეტაპზე, რაში მდგომარეობს ოჯახური კრიზისი და როგორია ოჯახის მომავალი და სხვ.

 ოჯახის სოციოლოგიის პრობლემებზე ლიტერატურა ქართულ ენაზე, სამწუხაროდ, ჯერჯერობით, ძალზე ცოტაა. დღემდე არ არსებობს შესაბამისი არც სახელმძღვანელო და არც ლექციების კურსი. ასეთ პირობებში ჩვენ საჭიროდ მივიჩნიეთ სტუდენტი ახალგაზრდობისათვის მიგვეწოდებინა ჩვენი სალექციო კურსი ოჯახის სოციოლოგიაში, რომელიც დამხმარე სახელმძღვანელოდ შეიძლება გამოადგეთ მათ. იგი ასევე გარკვეულ დახმარებას გაუწევს ამ საგნის ლექტორებსა და ოჯახის პრობლემებით დაინტერესებულ მკითხველებს.